Аз 19 августи соли ҷорӣ ҳайати гурӯҳи кории Вазорати маориф ва таҳсилоти олии Давлати Қатар таҳти роҳбарии ёвари директори котиботи вазири маориф ва таҳсилоти олии Давлати Қатар оид ба идоракунии лоиҳа Ҳариб Муҳаммад ал - Ҷобирӣ ҷиҳати баррасии мавзуи бунёди марказҳои омӯзиши забонҳои арабӣ ва англисӣ дар Тоҷикистон қарор доранд. Ҳайати мазкурро вазири меҳнат, муҳоҷират ва шуғли аҳолии Ҷумҳурии Тоҷикистон Солеҳа Холмаҳмадзода рӯзи 19 августи соли ҷорӣ ба ҳузур пазируфтанд. Ба ҳайати мазкур директорони департаментҳои Маркази хизматрасонии таълимӣ, эквивалентии шаҳодатномаҳои академӣ ва Маркази омӯзиш ва рушд, инчунин сардори шуъбаи назорат ва пайгирии Раёсати марказҳои хизматрасонии таълимӣ шомил мебошанд.

Бояд қайд намуд, ки масъалаи бунёди марказҳои омӯзиши забонҳои арабӣ ва англисӣ зимни сафари давлатии Асосгузори сулҳу ваҳдати миллӣ-Пешвои миллат Президенти Ҷумҳурии Тоҷикистон муҳтарам Эмомалӣ Раҳмон ба Давлати Қатар 21-22 январи соли 2024 ба мувофиқа расида, то ин давра як қатор ҷузъиётҳои он баррасӣ гардиданд. Зимни мулоқот қайд гардид, ки заминаи ҳуқуқии ҳамкориҳои Тоҷикистон ва Давлати Қатарро 16 санади байниҳукуматӣ ва байниидоравӣ ташкил медиҳад, ки яке аз онҳо “Созишнома байни Ҳукумати Ҷумҳурии Тоҷикистон ва Ҳукумати Давлати Қатар оид ба танзими қувваи корӣ дар Давлати Қатар” аз 3 феврали соли 2019 мебошад. Дар доираи татбиқи он Ёддошти тафоҳум оид ба ҳамкорӣ байни Вазорати меҳнат, муҳоҷират ва шуғли аҳолии Ҷумҳурии Тоҷикистон ва Вазорати меҳнати Давлати Қатар 8 июни соли 2023 ба имзо расида, ҳамкориҳо идома доранд.

Ҷонибҳо паҳлуҳои масъала оид ба таъсиси марказҳои омӯзиши забонҳои арабию англисиро дар Ҷумҳурии Тоҷикистон баррасӣ намуда, доир ба дурнамои ҳамкориҳои минбаъда ибрози назар карданд. Намояндагони Вазорати маориф ва таҳсилоти олии Давлати Қатар барои баррасии минбаъдаи масъала бо ниҳодҳои дахлдори худ изҳори омодагӣ намуданд. Мавриди зикр аст, ки бо мақсади бунёди Марказҳои омӯзиши забонҳои арабию англисӣ дар шаҳру ноҳияҳои мақсаднок, ҷудо намудаи китъаи замин ба мувофиқа расида, ҳайати мазкур аз мавзеъҳои интихобшуда боздид ба амал оварданд.